roblesolarte

" Las Bozes De Tus Pasos"

Te huites en deshando mi korason asolado,
Del ombre ke syempre kreyiya ke era amado,
Estava orozo i a tu kerensya atado,
Biviya feliz,savyendo ke era adorado.
Tu figura en mis ojos,tu boz en mis oyidos,
Los mijores kantes se kambiyaron en bruyidos,
Tu alesho me mata ... esta de grande largiya,
Mis visyos se amataron,pyedri mi alegriya...
Kamino en las kayes kon mis miradas vaziyas,
Akodrandome tus rizas i lo ke me diziyas,
El kontakto amorozo de tus lavyos de seda,
Emposible d'olvidarlos en mi memorya keda.
Syento la ambyertura de tus ermozos kantes,
Kero bivir akeyos tiempos amorozos d'antes.
Mi alma te dezeya,kon suspiros te nombra
Mis ojos bushkan en los kaminos tu solombra.
Aspero kon despasensya las bozes de tus pasos,
Dezeyo tus kaveyos sedozos por karesarlos..

Haim Vitali Sadacca
Montreal