"El Amor De Un Viejo"
Asentado en una taverna kon su vino,
Pasava komo filmo su vida por el tino.
Sus kaveyos blankos, desgustoso,kaje ido,
Miradas fiksas komo rebivir un olvido.
****
Pensava a eya, al sol de sus primveras,
Se alegrava kon sus memoryas verdaderas.
Kreyiya ke su sangre pasava por sus venas,
El, komo antes las sentiya...de lumbre yenas.
****
Mirava en basho komo bushkar sus patadas,
Viya ke sus alegrias eran amatadas
En sus ojos siempre la linda fizyonomia,
El dia dezganoso, la noche ensomnia.
****
Era un timido, no puedia avlarle,
Teniya espanto d'algun danyo no kavzarle.
El sekreto en l'alma lo tuvo munchos anyos,
Sin pueder amar otra mujer, le kavzo danyos.
****
Kon suspiro travo dos sorvos de su bevyenta
Sus ojos lagrimozos mostravan su bivienta.
Este grande amor en ke korason kaviya?
Esto el lo supo i el Dio solo lo saviya...
*****
La kandela antes ke este por eskaparse
La flama mas s'engrandese serka d'amatarse.
Haim Vitali Sadacca
Montreal
