Los tres amigos
Los tres eran amigos de kuando eran kriaturas
Los anyos pasaron komo soplo,kon vidas muy duras.
Sus amistades kontinuaron fin ke se kazaron,
Nunka se olvidaron d'akeyos tiempos ke pasaron.
*****
Despues de anyos el uno muy famoso devino,
Los dos dezearon ver a este amigo tan fino.
En mansevo era vistoso,vijitar lo kijeron,
Reanimar las memorias,avlar de lo ke izieron.
*****
El dia del rankontro estavan muy emosionados,
Kada uno konto sus rekuerdos,todos muy tokados.
Los tres borrachos de los komplimentos ke se disheron,
Se abrasaron kon amistades i se espartieron.
*****
Kontare sus konversasiones ke izieron sin gozo
"Vites nuestro amigo,el ke es tanto famoso?
Devino un korkovado,no lo vide saludoso...
Sus manos estavan tremblando i de vista mutrosa
Paresia a un ombre ke tiene vida malorosa.
Los antojos en la punta de su nariz enkolgados,
Las miradas eran fiksas,sus parparos abufados.
La fama amato sus sentidos i su humanismo
Se via sin afeksion,komo rayoso kon si mismo.
Yo prefero estar saludoso i bivir en provesa,
A kualo le valyo esta fama i esta rikesa ? "
*****
El riko konto a su mujer la vijita del dia
"El uno era poko kosho,el otro no sentia,
Remarki ke tenian un selo ke los dezazia.
Iva sentirme muncho mas kontente si no los via...
Nunka pensava ke iva verlos tanto aedados,
Eran proves,komo de sus famias abandonados.
Mal vestidos,deseozos saver de la vida mia
De mi fama ,mi prospero,mi rikesa i mi dia."
*****
En konkluzion, el poeta dize:
"Kon komplimentos falsos se alavan por konsolarsen
Les parese ke es un abraso de kerensya darsen.
La pensada de kerer aplikar la moda del dia,
Se dizen palavras dulses, doradas de hipokrizia ."
Haim Vitali Sadacca
Montreal
