So Kulpante o Humano?
Eramos un grupo de una juventud floresida,
En las edades ke la distraksion era meresida.
Las reuniones se azian en los shabades solo,
Un akordeon mos dava gozo...era un konsolo.
Estos dias eran konsiderados komo fiestas,
Para nuestros padres era komo tiempo de siestas.
Esperavamos los rankontros kon grande alegria,
Esta distraksion mos dava la mas grande enerjia.
Baylar ,reyir i ralamente karesos eskondidos
I en vezes unos delikados jestos defindidos.
*****
Los tangos santimantales mos envitavan a baylar,
Eramos kon prisa, mos levantavamos por angajar.
De un lado al otro kon alegrias korriyamos
Para eskojer la mas vistoza ke dezeyavamos.
Las sias eran vaziyas,solo una okupada
De una ijika ke se via desafortunada.
Yo en baylando echava una ojada a eya,
Era de aparensya sansible ,de kara no feya.
Mirava a los ke baylavan kon vista desganosa,
Un revolto kayado se via, komo inyervosa.
*****
El ser desapresyada o de su grupo desdenyada
Pensi a su amor propio i a su vida danyada.
En los bayles proksimos biviya kon la esperansa
Ke uno azera una reverensia por la dansa
De su kara se remarkava su grande dezespero,
Yo sentia su pena i su deseo verdadero.
*****
La musika empesava.... siempre mismas eskojidas,
Eramos yenos d’alegrias kon las mismas korridas.
Eya siempre en su siya ....Dramo ke me derritia.
Keria darle mi kerensia,solo para ke ria.
Me aserki kon sonrisa,ize una reverensia.
Remarki su gozo i l’emosyon en su aparensia.
Sentia su mano en mi ombro un poko tremblando,
Keria saver su vida i lo k’estava pensando.
Deseava baylar fin la manyana, por kontentarla
Para pueder vengarme de sus penas i kompensarla.
Kon ojos humidos en la ora de la espartision
En mis karas senti dos bezos kayentes de afeksion.
M’espanti d’alguna senteya d’amor si kavzaria
Si fue yerro el espertarla.....La kulpa era mia.
Puedeser ke so el kavzante de meterla en risko,
Salvandola de la luvya la arondji al piedrisko.
Perdoname Senior de ser el esklavo de mis sentidos
Pensando a los de « malas suertes» ke biven en feridos.
Haim Vitali Sadacca
Montreal
