"Un Djesto Inolvidavle"
Era elevo,apenas tenia kinze anyos,
Su kara triste,su vistimyenta de vyejos panyos
Kaminava para vender kozas a kriaturas.
Bonbones,djugetes,balas,lapes i minyaturas.
Disde su chikes ke kedo sin arimo,sin padre
Biviya una vida modesta djuntos su madre.
Un dia se sintyo kanso,sin fuersas ,fatigozo,
Estava komo hazino,abatido,sin gozo.
Kaminava debasho de akel sol muy kayente
Las kayes eran asoladas,no seviya djente.
Vido una mujer en su puerta trikotando
En ves en kuando a los pasharos migas echando.
Kon su timidez se aserko i kon su boz kalma
Tuvo el koraje i le disho lo de su alma...
""Senyora esto kansado,siento muncho la kalor
Puedo rogarle un vaso de agua por favor?""
La mujer kompasiva kon su korason humano
Le trusho un vaso de leche kon torta en mano.
La rengrasyo de alma kon sus ojos lagrimozos
Estuvo muy tokado de sus biervos ermozos.
*****
Los anyos pasaron muy presto la mujer humana
Biviya sola,sin marido sin una ermana,
Estando en peligro de muerte la transferaron
A un hospital d'otro teritoryo la yevaron.
La sensya de la medisina s'apliko en eya
En su kama siempre dormiya en kolor de teya.
Radiografias,tomografias,operasyones
Dias i noches sin avrir los ojos,kon passiones...
Despues de semanas se salvo de sus agonias
Retorno a la salud d'antes ,a sus alegrias.
Le trusheron la faktura antes de su salida
Se sintyo un golpe enorme ,su kara palida.
La suma komo si fuera una fortuna era,
Tremblando ekspliko su situasyon verdadera.
""No se preokupe por el pagamiento Seniora,
Deve kuidyarse de su salud, porke yora?
El profesor Mayerson mos eskrivyo una nota
Su pago fue echo kon vaso de leche i torta.""
Haim Vitali Sadacca
Montreal
