SO KULPAVLE O HUMANO

Eramos un grupo de una juventud floresida,
En las edades ke la distraksyon era meresida.
Las reunyones se aziyan los shabades solo,
Un akordeon mos dava gozo.... era un konsolo.
Estos dias eran konsiderados komo fiestas,
Para nuestros padres eran komo tiempos de siestas.
Esperavamos los rankontros kon grande alegriya
Esta distraksyon mos dava la mas grande enerjiya.
Baylar ,reyir i ralamente karesos eskondidos,
I en vezes unos delikados jestos defindidos.
Los tangos santimantales mos envitavan a baylar
Todos kon prisa mos alevantavamos por angajar.
De un lado al otro kon alegriyas korriyamos
Para eskojer la mas vistoza ke dezeyavamos.
Las siyas eran vaziyas, solo una okupada
De una ijika ke se viya desafortunada.
Yo en baylando echava una ojada a eya
Era de aparensya sansible,de kara no feya.
Mirava los ke baylavan kon mirada dezganoza
Un revolto kayado se viya , era desgustoza.
El ser desapresyada o de su grupo desdenyada
Pensi a l'alegriya de su vida ke era danyada.
En los bayles proksimos biviya kon la esperansa
Ke uno azera una reverensya por la dansa.
De la vista se remarkava su grande dezespero
Yo sentiya su deseyo i ardor en su aspero....
La musika empesava,siempre mismas eskojidas,
Eran yenos de alegriyas,kon las mismas korridas.
Eya en su siya...Dramo triste ke me deritiya .
Keriya darle mi kerensya,solo para ke riya.
Me aserki kon sonriza,ize una reverensya
Remarki el gozo i su emosyon en l'aparensya.
Sentiya su mano en mi ombro un poko tremblando
Keriya saver su vida i lo ke estava pensando.
Dezeyava baylar fin la manyana por kontentarla
Para tomar vengansa de sus penas i kompensarla.
Kon ojos humidos en la ora de la espartisyon
En mis karas senti dos bezos kayentes de afeksyon.
M'espanti d'alguna senteya d'amor si kavzariya
Si hue yerro el espertarla.... la kulpa era miya.
Puedeser ke so el kavzante de meterla en risko
Salvandola de la luvya la arondji al piedrisko.
Perdoname Senyor de ser esklavo de mis sentidos,
Pensando a los de malas suertes i a los sin nidos.

Haim Vitali Sadacca
Montreal

LETRA AL TIOPODEROSO

Dezeava verme en un mundo sin distinksyon
Para suprimir kovdisyas,selos i ambisyon.
TU El kriador de todas las bendichas almas,
Algunos en fuego,otros biven entre palmas.
Unos pasan la vida kon rikezas i rizas
Otros durante sus vidas son kon ansyas grizas.
Ken arto,ken ambierto,ken hazino kon ansyas,
Otros en bushkidas por envestir sus ganansyas.
Si el buen destino se regalava igualmente
Iva ser bivir en paradiso diferente.
Perdoname Senyor si es kulpa mi pensada
Esta petisyon es de tu parte enstalada.
Tu no sos el duenyo de l'alma? De mi sensya?
Tu no sos ke mos das potensya a l'egzistensya?
Me atrivo kon respekto Padre Piadozo
Por konfesar mis penas i kalmar mi dezrepozo.


Haim Vitali Sadacca
Montreal