La Mujer Pesimista"
Era una kazalina de edad muy avansada,
Kortava lenya de la montanya,estava kansada.
En su espalda la trayiya en akel sol fuerte,
Respirava kon difikultad,arogava su muerta.
""Me muerere i eskapare de esta mala vida,
En el sol,en el frio,en la luvya ,kada dia
Kon mis piernas ke me tremblan me matan estos kargos,
Fin kuando yo puedre azer estos kaminos largos?""
Echo lo de su espalda por deskansarse un poko,
De leshos una solombra viniya, poko a poko.
En viendo esta kara feya tuvo grande espanto,
Empeso a azer orasyones a su Dio santo.
""Yo so la muerte,vine presto,para ke kon mi vengas
Me yamates para eskapar i repozo ke tengas."
""Keen?Yoo?No Senyor'"diziya en tremblando i yorando
I kon sus manos flakas se estuvo aharvando...
""Yo esto kontente de mi vida, es verdad ke me kanso
Ma a todos mis deseos fasilmente los alkanso.
Yo keria muncho ke uno pase por ayudarme,
Bushkava un ombre a ke venga una mano darme,
So aedada,este kargo lo tengo muy pezgado,
Tengo dolores en l'aspalda,dolores en el lado.
Keriya kargar la lenya i a mi kabana irme
Esto sin fuersas en mi kama kero rebivirme."'
S'alevanto, tomo su kargo ,koryo komo fuyirse
No pensava mas a su kanserya ni a su tuyirse.
Unas bozes sentiya: "Kontentate kon tu suerte,
La vida es dulse,nunka deves rogar por tu muerte.
Mas vale kedar biva ,en sima de esta tierra
Ke de estar estirada debasho de una piedra.
Haim Vitali Sadacca
Montreal .
