"
"Siertas Pensadas"
No estes tanto siguro de ti i de tu rikeza,
No se save un dia komo puedra ser tu meza ,
No mires a tener borraches por tu buena fama
Un dia seras olvidado,ninguno te ama... ****
****
Palmas i alavasyones enborrachan las personas,
Tu korason no sentira mas las bozes ke sona,
No te deshes al koriente de un rio alokado,
Deves partajar tu amor,tu sensya i tu bokado.
****
No te glorifikes kon tu pasajera hermosura,
Esta natura poseda una enorme mesura.
Un dia te revoltaras kontra todos los espejos,
Te veras arugado,te toparas entre los viejos.
****
Bive alegre,mira a los faktos kon tu sonrisa,
Aleshate de un entorno ke tiene falsa risa
En tu serkano si remarkas por tu gloria un selo,
Fuye,sin desirle nada,sin alevantar su velo.
****
Nunka vas amostrar tu fortuna,ma ni yorar yores,
Bive modestamente en dando a tu suerte lores.
Si te sentiras un pezgo por algun pekado echo,
Demanda ekskuzas i bushka tu kamino derecho.
****
El pekado si era komo vino ke enborracha
O komo akea droga ke el meoyo lo mancha
Todos ivamos estar en las kayes komo lokos
Porke akeos ke no pekan kreyo ke son muy pokos.
Haim Vitali Sadacca
Montreal
