“”GRACIAS AL CREADOR””

Dio mio, a nuestra vida tu sos el que gravates
Placeres magnificos,con deseos mos regalates
En creando la mujer con esplandor d’una estrella
Que hechisa los hombres con las dulzuras de ella .
Su alma transparante como aquel vaso vacio
Hinchirlo d’amor no se si sera un pecado mio.
Ella me dio sonrisa como ofreser una rosa,
Este regalo divino rendio mi vida horosa....
Es que era mi culpa si las dos almas se miraron?
Si aquellas miradas en secreto se abrasaron?
Los sentidos de carinyo que en la vida mos dates
Alumbrates nuestra vivienta i la decorates.
Sos el duenyo de nuestros gozos y corasones
Tu nombre bendito esta en nuestras oraciones.

Haim Vitali Sadacca
Montreal

“ El Silensio de la Noche”

Un grito mudo sevia en su mirada,
Se hue ravioso ,desho su boz adorada.
El era un marido mas ke un amante
Garnido kon un korason de diamante.
Eya kulpante de kavzar este revolto,
Hue abandonada por su mal komporto.
*****
Esta mujer en una asolada kaza
Se sentia komo bivir ariento de braza.
Su oido en sus pasos kon dezespero
Se via en desolusion en su espero...
Los ojos en la puerta medya entornada
Kon miradas tristes de verse kastigada.
Los bezos se dekompozavan en su boka
Deshando savor amarga ke la aloka.
*****
Kada fin del dia,kuando eskuresia,
En el mundo kedo sola le paresia.
Keria tener su sol siempre asendido
El era su abrigo... ..techo de su nido.
Las soledades de las noches la matavan
Sus alegrias de bivir se amatavan
En el silensio de la noche.
*****
En el silensio de la noche
Kuando todo profundamente dormia
Ariento de akel sielo nuvlado via
Ke la luna kon su klaridad s’eskondia,
Komo un amor en l’alma disparesia....
Su deseo era de bivir komo antes,
Retornar a akeas alegrias i kantes
Olvidando akel silensio de las noches.

Haim Vitali Sadacca
Montreal