Memoryas de Un Guerfano" (Mi Chikes)
Kedimos guerfanos en nuestra chika edad,
Me akodro sus faktos ,su sansibilidad.
Biviyamos kon su amor de kerensyas yeno
Eramos alegres de vermos en su seno..
Porke se fue a akeyas tierras ajenas?
No saviya....teniya ocho anyos apenas.
Una madrugada mos bezo en la kama
S'espartyo deshando el fuego de su alma.
Vista abatida,sus ojos lagrimozos,
Se alesho deshandomos tristes i sin gozos.
En esta edad komo se save la baza?
El en bivo,yo komo guerfano en kaza.
Kon anyos supe la razon de su espartisyon,
Era para obtener mijor situasyon.
Peno una manseves entera en vano,
No uvo uno ke le dyera una mano.
No keriya vermos bivir en vidas duras,
Un padre amorozo de sus kriaturas.
*****
Despues de mezes un aviso malorozo,
Dizyendo ke se muryo de un dezrepozo.
Esto seguro ke en sus reflos d'alkavo
Puediyan oyir nuestros nombres de su bafo.
Esta forma s'eskrivyo mi chikes ,mi destino,
Siempre bivera en mi alma en mi tino.
Haim Vitali Sadacca
Montreal
