roblesolarte

El Deseo De Un Padre”

Mi kerido,
El tiempo ke yo estare mas aedado,
I ke me veras la mas parte asentado,
En vezes mal vestido i no arapado,
No t’ansieyes de verme en este estado.
Te rogo mira a entenderme.
****
No me kritikes si do valor al dinero,
Siempre devo pensar al dia venidero
La vida es larga,dinero da koraje,
Asperar ayudos es media muerte kaje.
Yo kero asembrar para ke tu rekoltes,
Por favor a mis konsejos no te revoltes.
Te rogo mira a entenderme.
****
Nunka topes el menester de korijarme,
Kon siertas avlas no mires a derokarme,
Si en mis komeres estare vagaroso
O si me veras un poko mas angustyoso,
En mi kama si esto medyo esviyoso,
Komo si fuera kon mi persona ravyoso,
Te rogo mira a entenderme.
****
Akodra tu chikes komo me okupava
En tus primeros pasos komo te kaminava
Mismo la komida a la boka te dava,
I siempre a tus yoros remedios topava,
En grande a tus estudios te ayudava
Para ver tu sonriza kualo no pensava?
Kon mis bezos i mis kantes te konsolava.
Yo yeno de gozo en los sielos bolava…
Si un dia, se trokara mi buen destino
No me aleshes de tu alma,de tu tino….
Te rogo, no te olvides todas mis penas
Mis deseos k’esten gravados en tus venas.
En mi dezespero i ennuvlado dia,
Tu sonrisa ke seya komo sol ke briya,
Siempre kero ver akel amor keyo viya
Deseo ser tu orgulyo,tu alegriya.
****
Fin al dia d’alkavo de mi espartision,
Kero ver tu sonrisa i tu konsolasyon
Te rogo mira a entenderme.

Haim Vitali Sadacca
New York
--