“Las Bozes de Tus Pasos”
Te huites en deshando mi korason asolado,
De tu ombre ke kreyiya ke era tu amado,
Estava oroso I a tu kerensya atado,
Biviya feliz savyendo ke era tu amado.
****
Tu figura en mis ojos,tu boz en mis oyidos,
Los mijores kantes se kambiaron en bruidos.
Tu alesho me mata,esta de grande largiya,
Mis visyos se amataron,piedri mi alegriya.
****
Kamino en las kayes kon mis miradas vaziyas,
Akodrandome tus rizas i lo ke me diziyas.
El kontakto amoroso de tus lavyos de seda
Emposible d’olvidarlo en mi memorya keda.
****
Siento la ambiertura de tus ermozos kantes
Kero bivir akeyos tiempos amorozos d’antes.
Mi alma te dezeya I kon suspiros te nombra,
En los kaminos mis ojos bushkando tu solombra…
****
Kon despasensya aspero las bozes de tus pasos,
Dezeyo tus kaveyos sedozos por karesarlos.
Haim Vitali Sadacca
New York
No hay comentarios:
Publicar un comentario