roblesolarte

"El Silensyo De La Noche"

Un grito mudo se via en su mirada,
Se hue ravyoso,desho su boz adorada.
El era un marido mas ke un amante
Garnido kon un korason de diamante.
Eya kulpavle de kavsar este revolto,
Fue abandonada por su mal komporto.
****
Esta mujer en esta asolada kaza
Se sentia komo ariento d'una braza,
Sus ojos en la puerta medya entornada
Kon miradas tristes de verse kastigada.
Los bezos se dekompozavan en su boka,
Deshando savor amarga ke la aloka.
****
Kada fin de dia kuando eskuresiya
En el mundo kedo sola le paresiya.
Keria tener su sol siempre asendido,
El era su abrigo...Techo de su nido.
Las soledades de las noches la matavan
Las alegrias de bivir se le amatavan
En el silensyo de la noche....
****
En el silensyo de la noche
Kuando todo profundamente dormia
Ariento d'akel sielo ennuvlado via
Ke la luna kon su klaridad s'eskondia
Komo l'amor ke en l'alma desparesia...
Su deseo era de bivir komo antes
Alkansar a sus alegrias i sus kantes
Olvidando akel silensyo de las noches.

Haim Vitali Sadacca
Montreal