"Las Flores Amariyas"
Te estas indo...yo kedi komo ombre ferido,
Deshandome medyo bivo , kon korason tuyido.
Kon miradas tristes segiyi tus pasos,tu ida,
Tu kaminada kansada i komo repintida.
Kreyo k' estavas luchando kon toda tu konsensya,
Ma no te permetiya tu orgulyo,ni tu sensya
Para pueder dizirme"perdona mis kaprichos
Kero retornar a mi nido,olvida mis dichos."
******
Kon ti siempre me senti el ombre mas horozo,
Eras mi amoroza...me viya yeno de gozo.
Mis lavyos repetan la poezia ke diziyas.
Bivo los suvenires sintiendo tus melodiyas.
Kreyiya ke siempre en tu korason me teniyas,
Biviya kon la konviksyon ke me aparteniyas.
Tu ida kavzo trokamientos kon tu espartision
Kedi sin alegriya,sin buto i sin afeksion...
******
Kamino solo... en las kayes me siento tuyido,
Mi korason yora a las kayades,sin bruyido.
Munchas demanyanas al lado tu fotografiya
Pozava las flores amariyas ke te plaziya.
Las noches este korason kon suspiros te nombra,
I mis ojos bushkan en los entornos tu solombra.
Komo yo puedre d'aryento de mi arankarte?
Para retornar a mi bivienta i olvidarte....
Haim Vitali Sadacca
Montreal
No hay comentarios:
Publicar un comentario