Keridos amigos,
En el anyo 1263 le-misparam, en la sivdat de Barcelona, Reyno d’Aragon, las disputas teolojikas entre un haham sefaradi, el Ramban, yamado komunmente Nahmanides, z"l, tuvyeron luguar kon el buto d'amostrar la presupuesta vedrat tokante al Kistyanizmo a eskuentra del Djudezmo. El Ramban, z"l, favlo avyertamente i, en la konkluysyon de talas disputas el Rey Djaume I d’Aragon, denusyo ke en su vida no aviya sintido un kavzo tanto endjusto en un pleyto de tanta djustedat. Est’evenimyento avryo las puertas a un masivo kemar de literatura djudiya i el Ramban, z"l, se demudo de rezidensya a Provensa ande, al eskapijo de su vida, fue niftar. Fue tambyen en la konkluysyon de las disputas de 1263 le-misparam ke una munchedumbre enorme de Sefaradis sufryeron el baftizmo forsado, Sefaradis los antepasados de muestros Bnei a-Anusim a-Sefaradim d’oy diya.
Aun kon esto, fue la Grande Disputa de Tortoza, en Terragona del Reyno d’Aragon, en serka de los anyos 1413-1414 le-misparam, ke produyzyo las mas drastikas konsekuensas para el puevlo djudyo. En 1412 le-misparam, el Anti-Papa Bendicto XIII, ken fue rekonosido komo tal en el Reyno d’Aragon, enkomendo ke vinyeran reprezentantes de las komunidades djudiyas d'Aragon i Katalunya para una disputa delantre de el mezmo tokante a los argumentos d’un Djudyo konverso i oportunisto nombrado Djeronimo. La disputa aturo kuaji 20 mezes, entre los kualos 69 apanyamyentos tuvyeron luguar. El Papa Benedicto XIII mezmo s’asento komo kapo i djuez, un rolo muy aktivo.
Des del propryo empesijo, la disputa no tomo la forma d’una diskusyon livera entre los partisipantes, si non d’una d’atakes propagandistikos misyoneros akompanyados de presyon psikolojika fin a la punta de yegar a l’entimidasyon y las amenasas de la vanda kistyana a eskuentra de los Djudyos, kon el buto de forsarlos a akseptar los argumentos de sus adversaryos. En esta disputa los delegados djudyos los mas distingidos fueron el Haham Zerahya a-Levi, el Haham Astruk a-Levi, el Haham Yosef Albo, i el Haham Matityau a-Yiz’hari.
Pishin duspues del primer enkontro, el Papa anunsyo – a la kontra de las promesas kon las kualas se aviya akonantado – ke no era su entisyon ver despleygarse una diskusyon entre dos partes egualas, si non ver prezentarse la prova de vedrat del Kistyanizmo y sus prinsipyos. Estonses, Djeronimo empeso la disputa kon velada amenasa a eskuentra de los ovstinados Djudyos, y alora paso a l’amenasa derecha. En los argumentos prezentados por los Djudyos, Djeronimo les arrespondyo en akuzandolos d’ereshiya en kontra las sus proprya relijyon i ke por tala razon doviyan de ser tratados por el Santo Ofisyo de l’Inkizisyon. Adyentro d’esta pezgada atmosfera los reprezentantes fueron travados d’espanto i de konfuzyon.
En vezes, dunke, no tenivan la fuersa o no reushyeron a arresponder en lo djusto, sovre todo en vista de las repuestas ke no le plaziyan al Papa i k’espertaron vulgaras baranas.
La disputa de Tortoza konduysyo a isterikas ondas de konversyon forsada de Djudyos i de famiyas enteras de Djudyos al Katolisizmo Romano a toda la longura i l’anchura de los Reynos d’Aragon i de Kastilya, fakto ke rezulto en un’amplya difuzyon de pogromes ke los forsavon a los Sefaradis a konvertirsen en el anyo 1391 le-misparam. D’esta mizeridat de los Sefaradis dezgrasyados desyenden en toda provavilidat la mas graude parte de los Bnei a-Anusim a-Sefaradim aktualmente.
Koelet, (el livro d’Eklesyastes) mos dize k’egziste un tyempo i luguar para todo. Para los Bnei a-Anusim a-Sefaradim, tal momento ya yego. Akel tyempo es agora i el luguar esta aki en el siber-espasyo.
Omildemente, yo, Charles Barouh Abraham, komo reprezentante de mi puevlo djudyo, el Remanente d’Israel, desendyentes de los refujyados de los Reynos d’Aragon i de Kastilya en 1492 le-misparam, aki do akeyos pasos avante para revijitar la Disputa de Tortoza. Oy diya la Egliza dove konsiderar en l’odjetivo i kon myente avyerta muestra repuesta a todos akeyos ke pudyeran kometer la endjustisya del ombre kontra sus semejantes en nombre del "Principe de la Paz". Es mi dezeyo ardyente ke esta repuesta muestra yege a alkansar en lo djeneral a todos muestros ermanos pedridos, los Bnei a-Anusim a-Sefaradim en la Peninsula Iberika i en el Muevo Mundo, i en lo partikular mezo los ordinatores bibliotekaryos a todos los relijiyozos ke bushkan de ser senseros i onestos, los moradores de los monasteryos i las monjeriyas del mundo luzo-ispaniko.
Esta vez en muestra estorya, no tomamos la defensiva komo la ultima vez en la sivdat de Tortoza, Tarragon, el Rayno d’Aragon, delantre del Papa i los Prinsipes de la Egliza. Non, esta vez kon byervos firmes i siguros tomamos la palavra komo konsejero d’amavilidat i d’amistat delantre del D.io i de los muestros, los Bnei a-Anusim a-Sefaradim.
La orasyon de prima emportansya en la Kistyandat s’entitula en el latin de la Egliza Katolika Romana el "Pater Noster". Est’orasyon, asigun el Evanjelyo de Lukas, fue pronunsyada por Jesus kuando sus deshiplos arrogaron ke los ambeze a orar: "Y sucedio que, estando el orando en cierto lugar, cuando termino, le dijo uno de sus discipulos, Senyor, ensenyamos a orar’, como ensenyo Juan a sus discipulos," (Biblia de Jerusalem, Lucas 11:1). Kon este versiklo mo s’entroduize a una de las mas breves, i ainda mas ekstensiva- mente elavoradas orasyones ke ya se pudyera ekspresar. Rigurozamente monoteista, el "Padre Nuestro" ya sirvyo a traverso los syeglos komo el prototipo ideal de la fervyente orasyon i rogativa de todos los Kistyanos.
Sera mezo un’analiza detalyada d’esta orasyon ke arresponderemos en este momento de l’estorya sefaradiya a la Disputa de Tortoza.
No hay comentarios:
Publicar un comentario