roblesolarte

El deseo i el plaser ke siento por eskrivir
Me da fuersa a mi egzistensya i a mi bivir.
Ekspliko la vida,los amores kon melodias,
Me siento komo borracho,so yeno d’alegrias.
Kuando veo un amoroso miro sus miradas,
Ke son yenas de kerensya i kon luzes pintadas.
****
Estos sentimientos me enspiran i los desino,
Los dekoro kon l’alma,los enkuadro en mi tino.
Ma veo otras miradas en siertos malorozos
Ke me paresen ver los gritos mudos en sus ojos.
Kaminan kon una facha triste,son desgustozos
Tienen revolto kon la suerte ,son leshos de gozos .
****
Estas pinturas gravadas en mi tino me matan,
Mis alegrias poko a poko me se amatan .
Yo,si so el solo espektador de alegrias
Ke vale si las siyas del entorno son vasias.
Siempre dezeyi distribuir las sonrizas mias
A bivdas,a huerfanos las noches i los dias.
****
A kualo vale si yo alkanso a lo ke kero?
Si mi entorno bive kon ansyas i dezespero.

Haim Vitali Sadacca
Montreal