roblesolarte

“”Las Flores Amarias””

Te estas indo... Yo kedi komo ombre ferido,
Deshandome medyo bivo i korason tuyido.
Kon miradas tristes segiyi tus pasos,tu ida,
Tu kaminada kansada i komo repintida...
Kreo k’estavas luchando kon toda tu konsensia,
Ma no te permetia tu orgulio,ni tu sensia
Para pueder disirme””perdona mis kaprichos
Kero tornar a mi nido olvida mis dichos.””
*****
Siempre kon ti me senti el ombre mas oroso,
Eras mi amorosa...me via yeno de goso.
Mis lavios repetan la poesia ke disias.
Bivo los suvenires , sintiendo tus melodias.
Kreyiya ke siempre en tu korason me tenias
Bivia kon la konviksion ke me apartenias.
Tu ida kavso trokamientos kon tu espartision
Kedi sin alegria,sin buto i sin afeksion.
*****
Kamino solo... en las kayes me siento tuyido,
Mi korason yora a las kayades,sin bruyido.
Munchas demanyanas al lado tu fotografia
Metia las flores amarias ke te plasia.
Las noches este korason kon suspiros te nombra,
I mis ojos bushkan en los entornos tu solombra.
Yo, komo puedre d’aryento de mi arankarte?
Para retornar a mi bivienta i olvidarte... .

Haim Vitali Sadacca
Montreal