"El Revolto De Un Marido"
Te vide de leshos sin dizirte nada,
Ni kon mi sonrisa,ni kon mi mirada,
Tuve miedo de rebivir mi olvido
Mis ojos te vyeron,l'alma no te vido.
Si una noche entras a mi esfuenyo
Mi korason no sera mas mi duenyo
Ke palpita kon fuersa por despertarme
I de nuevo a tus brasos rempusharme...
Olvidi tu nombre,tu falsa kerensya,
Te deshare mis odios komo erensya.
No meresites a kompartir mi vida
Yo ke t'apresyava komo mi kerida...
Te viya komo mi flama eternela,
Si me rekuerdo,la sangre me se yela.
Una madre ke desha su kriatura
Arondja su marido a vida dura
No se el Dio si kerera perdonarla
O a kastigos mas fuertes kondanarla.
Haim Vitali Sadacca
Montreal
No hay comentarios:
Publicar un comentario