roblesolarte

"Los Tres Amigos"

Los tres eran amigos de kuando eran kriaturas.
Los anyos koryeron tanto presto kon vidas muy duras,
Las amistades kontinuaron fin ke se kazaron,
Nunka se olvidaron d'akeyos tiempos ke pasaron.
*****
Despues de anyos ,el uno muy famoso devino
Eran deseyozos de ver a este amigo fino,
En mansevo era vistoso,vijitarlo kijeron,
Reanimar las memoryas,avlar de lo ke izyeron.
*****
El dia del rankontro estavan muy emosyonados,
Kada uno konto un rekuerdo,todos muy tokados,
Los tres borrachos de los komplimentos ke se disheron
Se abrasaron kon amistades i se espartieron.
*****
Kontaremos todo lo ke entre eyos avlaron:
""Vites nuestro amigo el ke es tanto famoso?
Devino un korkovado,no lo vide saludoso.
Sus manos estavan tremblando i de vista mutrosa
Paresiya komo un ombre de vida malorosa.
Sus antojos en la punta de la nariz enkolgados
Las miradas eran fiksas,sus parparos abufados.
La fama le amato sus sentidos,su humanismo,
Estava sin afeksyon,komo ravyoso kon si mismo.
*****
El riko konto a su mujer la vijita del dia,
"El uno era poko kosho,el otro no sintiya
Remarki ke teniyan un selo ke los dezaziya.
Iva sentirme muncho kontente si yo no los viya.
Nunka pensava ke los iva ver tanto aedados
Eran proves komo de sus famiyas abandonados.
Mal vistidos i kuryozos de saver sovre mi vida
De mi fama,mi prospero ,mi rikesa i mi yida."
*****
"Konklusion"
Kon komplimentos falsos se alavan por konsolarsen
Les parese ke es un abraso de kerensya darsen,
La pensada de kerer aplikar la moda del dia
Se dizen palavras dulses doradas d'hipokrisia.

Haim Vitali Sadacca
Montreal